Medisinsk fotografi 12

Kva meinast med medisinsk fotografi og kva for fotografi passar eigentleg innunder ein slik tematikk?

Innanfor det medisinske feltet er medisinsk fotografi synonymt med klinisk fotografi, altså ein praksis kor bilete av kroppen, som eksempelvis synleggjer symptom eller skadar, og som blir tatt i samband med undersøking, blir nytta til å stille ein diagnose. Slike fotografi har såleis ein særskilt funksjon knytt til undersøking og behandling, og blir også nytta som støtte til forsking, i undervisning og som dokumentasjon. I tillegg til fotografi inngår også andre typar bilete, som kan gi innsikt i ein viss sjukdom eller tilstand hos den som blir undersøkt, i den utvida kategorien kliniske bilete. Røntgen eller MR er døme på dette.

Sjølv om ein i dag har utvikla svært komplekse teknologiske metodar for å synleggjere kropp, symptom og sjukdom, har fotografiet spelt ein viktig rolle i biletdiagnostikken, nesten heilt sidan det vart oppfunne. Rundt 1850 - vel ti år etter at oppdaginga av den fotografiske teknikken daguerreotypi vart lansert av Louis Jacques Mandé Daguerre - var det stor semje blant legar og andre vitskapsmenn om at fotografiet tilgjengeleggjorde ting på ein naturtru, nøyaktig og nøytral måte. Desse eigenskapane låg til grunn for at fotografiske praksisar vart etablert og vidare systematisert innanfor medisinen, men også for andre vitskaplege disiplinar, allereie frå midten av 1800-talet. (Sjå t.d. Schwartz, "“Records of Simple Truth and Precision”: Photography, Archives, and the Illusion of Control", 2000 )

Fotografia i utstillings-kapittelet om lepra, sorterer under denne typen forståing av medisinsk fotografi.

Omgrepet medisinsk fotografi kan også bli nytta, litt meir upresist og omfattande, om fotografi som på ulike vis handlar om medisin eller om det medisinske fagfeltet. Dette gjeld nok særleg for fotografi som blir forvalta av institusjonar utanføre helsefaglege disiplinar, som museum, arkiv og samlingar. Sjå til dømes den store variasjonen som kjem fram ved å søke på dette emneordet på Digitalt museum.

I samband med katalogisering av medisin-relatert fotografi sorterer gjerne mange ikkje-kliniske bilete under emneordet medisin. Dette gjeld også for mange av fotografia som er katalogisert og publisert på Marcus.

Eitt av dei litt kuriøse døma i Billedsamlingen sin katalog viser til ein vitaminrik medisinsk torsketran, produsert av det Bergensbaserte firmaet Smit & Zoon. Fotografi av sanitetsstuen ved Bergen Mekaniske Verksted i Solheimsviken, tatt i 1945, ligg også under dette emneordet, likeins fotografiet "Instrument, Haukeland Sykehus". Desse fotografia er ikkje tatt i samband med undersøkingar eller diagnostisering, og har såleis ingenting til felles med klinisk fotografi.

Denne observasjonen viser at det kan vere nyttig å etablere meir presise kategoriar og emneord innunder den overordna kategorien medisin. Til dømes kan ein lage eit tydeleg skilje mellom klinisk fotografi (dersom ein har slikt materiale) og helsefagleg fotografi. Andre klargjerande emneord kan vere oppdrags-, utstyrs- og produktfotografi. Slike grep vil bidra til meir presise biletsøk, samstundes som det vil vere med på å synleggjere at det faktisk er og har vore ganske ulike typar fotopraksisar og dokumentasjonsbehov gjennom medisinhistoria.